2019 оны 09 сарын 17
ӨВ НИЙГЭМ

АРВАЙХЭЭР ХОТНОО "ТЭМЭЭЧДИЙН БАЯР"-ЫГ ӨРГӨН ДЭЛГЭР ТЭМДЭГЛЭЛЭЭ

Арвайхээр хотноо анх удаа “Тэмээчдийн баяр”-2019 арга хэмжээ зохион байгуулагдлаа. Тэмээний баярт Төгрөг, Богд, Сант, Баянгол, Баруунбаян-Улаан, Гучин-Ус, Хайрхандулаан сумдын 200 гаруй тэмээчид оролцсон. Тус баярын арга хэмжээ нь Хөдөлмөр, нийгмийн хамгааллын сайд болон Өвөрхангай аймгийн Засаг даргын ивээл дор явагдсан бол зохион байгуулагчаар Өвөрхангай аймгийн тэмээний Монголын хоолой холбоо ажиллалаа.

Тэмээн сүргийн соёлыг түгээх зорилготой уг арга хэмжээний нээлтэд аймгийн ИТХ-ын дарга А.Ишдорж, Засаг дарга Г.Ганболд болон Хөдөлмөр, нийгмийн хамгааллын яамны төлөөлөл оролцож үг хэллээ.

Аймгийн ИТХ-ын дарга А.Ишдорж “Тэмээчдийн баярыг зохион байгуулж занших нь өвлийн улиралд жуулчдыг татах чухал ажил болох юм” хэмээн онцлон хэллээ.


Харин аймгийн Засаг дарга Г.Ганболд “Тэмээчдийн баярыг тогтмол зохион байгуулж тэмээн сүргийн соёлыг түгээн дэлгэрүүлэх, тоо толгой, ашиг шимийг нь нэмэгдүүлэх, аялал жуулчлалын чухал нэг хэсэг болгоход зорин ажиллана” гэлээ.

Тэмээчдийн баярын хүрээнд зохион байгуулагдсан уралдаануудад дараах тэмээчид амжилттай оролцлоо.

·         “Шилмэл буур”-аар Төгрөг сумын тэмээчин Ц.Мөнхбатын хар буур

·         “Шилмэл ат”-аар Гучин-Ус сумын тэмээчин Д.Шийрэвсамбуугийн хүрэн ат

·         “Шилмэл ингэ”-ээр Гучин-Ус сумын тэмээчин О.Сэдэдийн хүрэн ингэ

·         Хурдан торомны уралдаанд Төгрөг сумын тэмээчин н.Чулуунбаатарын улаан тором түрүүлэв

·         Атан тэмээний уралдаанд Төгрөг сумын тэмээчин Ж.Намсрайжавын улаан ат түрүүлэв

·         Тэмцээний “Сайхан хос”-оор Гучин-Ус сумын 2 дугаар багийн тэмээчин Ж.Цэдэндамба, Б.Чанцалгялбий нар шалгарсан.

·         Шагай шүүрэх тэмцээнд Төгрөг сумын тэмээчин Б.Нямбат тэргүүлэв.

Мөн Өвөрхангай аймгийн тэмээчдийн “Монголын хоолой” холбооны “Цол олгох тухай” журмын болзлыг хангасан Богд сумын тэмээчин Б.Эрдэнэбилиг тэргүүтэй нэр бүхий 6 тэмээчинд “Аймгийн алдарт тэмээ уяач” цолыг олголоо.